ფილიპინების სამხრეთ სანაპიროსთან პარასკევს დილას მომხდარმა 7.4 მაგნიტუდის სიმძლავრის მიწისძვრამ სულ მცირე 2 ადამიანი იმსხვერპლა, დააზიანა საავადმყოფო და სკოლები, გამოიწვია ელექტროენერგიის გათიშვა და ცუნამის საშიშროება შექმნა, რის გამოც სანაპირო რეგიონებიდან მოსახლეობის ევაკუაცია განხორციელდა.
ფილიპინების ვულკანოლოგიისა და სეისმოლოგიის ინსტიტუტის ინფორმაციით, მიწისძვრის ეპიცენტრი ზღვაში , ქალაქ მანაის აღმოსავლეთით 27 მილის დაშორებით მდებარეობდა.
პროვინცია დავაო ორინტალის გუბერნატორმა, სადაც მანაი მდებარეობს, განაცხადა რომ დაზიანებული საავადმყოფოდან დაახლოებით 250 პაციენტი იქნა ევაკუირებული და დროებით კარვებში განთავსდა.
“მანქანას ვმართავდი, როდესაც მოულოდნელად გზა შეირყა და დავინახე როგორ ირხეოდა ელექტროსადენები, ადამიანები სახლებიდან და შენობებიდან ქუჩაში გამოვარდნენ, შემდეგ შუქიც ჩაქრა“ განუცხადა მედიის წარმომადგენლებს დავაო ორინტალის კატასტროფების მართვის ოფიცერმა ჯუნ საავედრამ.
ქვეყანა ჯერ კიდევ ებრძვის იმ კატასტროფის შედეგებს, რომელიც 30 სექტემბერს სიბუს პროვინციაში მომხდარმა 6.9 მაგნიტუდის სიმძლავრის მიწისძვრამ მოიტანა, რის დროსაც 74 ადამიანი დაიღუპა, ათასობით კი უსახლკაროდ დარჩა.
ყოველწლიურად ფილიპინებს დაახლოებით 20 ტაიფუნსა და ქარიშხალთან უწევს გამკლავება, რაც სამაშველო და ჰუმანიტარულ ოპერაციებს სამთავრობო სტრუქტურებისა და მოხალისე ჯგუფებისთვის ერთ-ერთ მთავარ გამოწვევად აქცევს.
- კომენტარები
