“მათ მოსთხოვეს ფული, მაგრამ არ მოიტანეს და ახლა იჭერენ…” გია ხუხაშვილი შოკისმომგვრელ განცხადებას ავრცელებს
კარგა ხნის განმავლობაში მითქმა-მოთქმა არ წყდებოდა, რომ ექსპრემიერ ირაკლი ღარიბაშვილისა და სუს-ის ყოფილი უფროსის გრიგოლ ლილუაშვილის თავს შავი ღრუბლები იყიდა თავს და რომ მათი დაჭერაც კი არ იყო გამორიცხული. ცოტა ხნის წინ ცნობილი გახდა, რომ ერთობლივი ღონისძიების ფარგლებში განხორციელდა საქართველოს ყოფილი პრემიერ – მინისტრის, ირაკლი ღარიბაშვილის, სახელმწიფო უსაფრთხოების სამსახურის ყოფილი უფროსის გრიგოლ ლილუაშვილის, ყოფილი მთავარი პროკურორის ოთარ ფარცხალაძის და მათთან დაკავშირებული სულ 8 პირის საცხოვრებელი ბინების, სახლების და პირადი ჩხრეკები, – ამის შესახებ საქართველოს გენერალურმა პროკურორმა გიორგი გვარაკიძემ ბრიფინგზე განაცხადა.
მისი თქმით, ამოღებულია სხვადასხვა ელექტრონული მოწყობილობა, დოკუმენტაცია და დიდი ოდენობით ფულადი თანხა.
მიმდინარე პროცესებზე კომენტარი ვთხოვეთ ექსპერტ გია ხუხაშვილს, რომელიც მომხდარს იმას უკავშირებს, რომ ამ მაღალჩინოსნებმა “ბიძინას სალარო არ შეავსეს“ და ეს არის კობახიძის ერთგვარი თამაში მეფის კარზე:
“ეს ინფორმაცია, ისინი შეიძლება დააკავონ, დიდი ხანია ტრიალებს, შესაბამისად, ეს ჩხრეკები განსაკუთრებული სიურპრიზი არ არის. ეს ძალიან ბანალური ისტორიაა – მათ მოსთხოვეს ფული, მაგრამ არ მოიტანეს და ახლა იჭერენ. ზოგადად რომ ვთქვათ, სისტემა არის ერთგვარი ურჩხული, რომელსაც მუდმივად კვება სჭირდება და როდესაც მას საკვები ელევა, ის საკუთარი სხეულის ჭამას იწყებს. ახლა ამ პროცესში ვართ და რა მნიშვნელობა აქვს, ვინ ვინ არის და ვინ ვისი კაცია, ეს კანონზომიერებაა. გასაგებია, რომ ამათ ახლა არ აღმოუჩენიათ კორუფცია, კორუფციასთან ბრძოლასთან არ გვაქვს საქმე. კორუფცია, თავისთავად, სისტემის შემადგენელი ნაწილია, ის კორუფციაზე დგას და მის გარეშე ვერ იარსებებს. რა გგონიათ, ღარიბაშვილს და ლილუაშვილს თუ დაიჭერენ, მათ ადგილზე ვინც მოვლენ, ისინი მერე კორუფციაში არ იქნებიან? ისინიც იქნებიან იმიტომ, რომ ავტორიტარული სისტემის მდგრადობა მხოლოდ კორუფციით შეიძლება იქნას შენარჩუნებული, სხვანაირად შეუძლებელია”.
ხუხაშვილი გამორიცხავს, რომ ამ მაღალჩინოსნების სახელები შესაძლოა 4 ოქტომბრის მოვლენებს უკავშირდებოდეს:
“ვფიქრობ, რომ ესეც ერთგვარად შემოგდებული თემა იყო, გამომდინარე იქიდან, რომ როგორც ჩანს, კობახიძეს ბიძინასთან ვალდებულება ჰქონდა აღებული, რომ ის ამ ხალხს მოსთხოვდა ფულს და ისინიც მოიტანდნენ. რადგან სიტყვა ვერ შეასრულა და ყოფილებმა ხარკის გადახდაზე უარი თქვეს, მერე ამას დაურთო პოლიტიკური ლეგენდა, რომ თურმე ფული იმიტომ არ მოაქვთ, ოპოზიციასთან აქვთ საქმეო. კობახიძეს ბიძინასთან თავი ხომ უნდა ემართლებინა – აი, ბატონო ბიძინა, ფული იმიტომ ვერ ამოვიღე, რომ ისინი ოპოზიციასთან თანამშრომლობდნენო. მთელი ამ ისტორიის პოლიტიკური განზომილება იმაშია, რომ შევადაროთ, ბრაზილიურ სერიალებში ბოროტი ბავშვები რომ არიან, მამის ერთადერთ მემკვიდრედ დარჩენისთვის რომ იბრძვიან და მამას რომ უყვებიან, როგორ ჰპარავენ მას ფულს სხვა შვილები, როგორ ეჯავრებათ მამა და ერთადერთი წესიერი და მოსიყვარულე თვითონ არის… ეს კობახიძეს იმაში სჭირდება, რომ მას საკუთარ ბედთან დაკავშირებით ცუდი მოლოდინები აქვს და ფაქტობრივად, გადარჩენის ერთადერთ გზად მიაჩნია ის, რომ მამის ერთადერთი მემკვიდრე დარჩეს, ამიტომ ცდილობს ბიძინას ირგვლივ მაქსიმალურად მოასუფთაოს ველი, რათა მას არანაირი ალტერნატივა არ დაუტოვოს. ბიძინამ ეს იცის, ბიძინას თავისი თამაში აქვს და შემდეგი სვლა მისია. ჯერჯერობით მას კობახიძე მიშვებული ჰყავს, მაგრამ კობახიძე ძალიან მოლიპულ გზას ადგას”.
- კომენტარები
