"რაღა იყო დარჩენილი მის ქორწილამდე... ზურას ახლა უნდა შეექმნა ოჯახი, ემზადებოდა" - ახალგაზრდა მოტოციკლით გადაადგილდებოდა, როცა ვტომობილი დაეჯახა

ბათუმში მომხდარ უმძიმეს ავარიას ახალგაზრდა ბიჭის, ზურაბ ჩხაიძის სიცოცხლე შეეწირა. ახალგაზრდა მოტოციკლით გადაადგილდებოდა, როცა მას ავტომობილი დაეჯახა. არსებული ინფორმაციით, ავტომობილს უკრაინელი ქალი მართავდა. სამწუხაროდ მიყენებული დაზიანებებით ლანჩხუთელი ზურა ჩხაიძე ადგილზე გარდაიცვალა.

გლოვაა გარდაცვლილის სოფელში, ზურა ჩოჩხათიდან იყო. ყველა მისი ქორწილისთვის ემზადებოდა, ჩანიშნულიც იყო - დღე. 22 ნოემბერს უნდა მოეყვანა ცოლად მისი რჩეული გოგონა, მაგრამ წამებში ყველაფერი თავდაყირა დადგა. სოციალური ქსელი სავსეა ემოციური სტატუსებით.

"ძალიან მძიმე ტრაგედია დატრიალდა. გლოვაა სოფელში, ზურა ჩემი შვილების მეგობარია, ჩემი ახლო მეზობელი, ჩემ თვალწინ გაზრდილი ბიჭი. ორი შვილი გაზარდა მისმა კარგმა მშობლებმა, გოგო და ბიჭი ჰყავთ. გოგო გათხოვილია, ზურას ახლა უნდა შეექმნა ოჯახი. ქორწილისთვის ემზადებოდა, ბათუმში მუშაობდა, მოტოციკლეტით გადაადგილდებოდა ხოლმე ქალაქში, სამსახურიდან სახლში მოტოციკლით მოძრაობდა, ამ დროს დაეჯახა მანქანა. როგორც ამბობენ, ქალი იჯდა მანქანის საჭესთან, უცხოელიაო დამნაშავე. ზურას ცოლის მოყვანას აპირებდა, 22 ნოემბერს ქორწილი უნდა ჰქონოდა, ჩანიშნული იყო - დღე. ლანჩხუთელი გოგო უნდა შეერთო ცოლად და უცებ ეს უბედურება დატრიალდა. საოცარი ბიჭი იყო. მასზე ძვირის მთქმელი კაცი არ მოიძებნება. ჩემს შვილებთან გაზრდილია შვილო, არ ვიცი რა ვთქვა, გული მეწვის, ისეთი თბილი, მოსიყვარულე, პირმცინარე ბიჭი იყო, დაგინახავდა, მოვიდოდა. გვერდს არ აგივლიდა, თანატოლებში თუ რამე იყო საჭირო, უკან არაფერზე არ დაიხევდა. ყველას გვერდში მდგომი, თავდადებული, მოსიყვარულე, ყველაფერი, რაც დადებითი შეიძლება ითქვას, ზურაზე ითქმის. სამარშუტო ტაქსის მძღოლია მამამისი, რამაზ ჩხაიძე, ლანჩხუთი ჩოჩხათის მარშუტზე ზის. წინა დღეს მამამისს შეემთხვა ავარია, გადარჩა საცოდავი კაცი და თურმე მეორე დღეს ასეთი საშინელი ტრაგედია ელოდა წინ. ჯერ დაკრძალულიც არ გვყავს ზურა. 31 ოქტომბერს დატრიალდა ეს ტრაგედია და ხუთშაბათს, 6 ნოემბერს არის დაკრძალვა. რაღა იყო დარჩენილი მის ქორწილამდე და დღეს ამ რეალობის წინაშე ვართ. ყველა თავზარდაცემულია ამ ამბით. საერთოდ რა გვჭირს ქართველებს, ინტერნეტში შესვლაც აღარ მინდა, სულ ახალგაზრდები იღუპებიან, ასე რამ დაგვწყევლა, საშინელება ხდება. დღე არ გადის რომ არ დაიღუპოს ახალგაზრდა. არ ვიცი, მისი მშობლები ამას როგორ გადაიტანენ," - ამბობს ზურას მეზობელი.

ზურა ჩხაიძეს ემშვიდობება მისი საცოლე. მან არაერთი ტკივილიანი სტატუსი დადო სოციალურ ქსელში. "ეს რა დღე დამიდგა ჩემო ზურაა, ჩემო ყველაზე დიდო სიყვარულო და ყველაზე მწარევ... ჩვენი ყველა ოცნება აუსრულებელი დამიტოვე, ჩემო ზურა. ეს რა მიქენი ბიჭო, რატომ მიმატოვე ასე სამუდამოდ, ჩემო გულის და სული ნაწილო. უშენოდ როგორ ვიცხოვრო... ვაი, შენს სოფოს, უშენოდ რა ეშველება ბიჭო, შენ ხომ ამდენი ცრემლისთვის მე არ გემეტებოდი. თვალზე ცრემლს რომ დამინახავდი, შენც ჩემსავით ტიროდი და გულში მიხუტებდი, " - წერს მისი საცოლე.

მომხდარი ავარიის მიზეზებს ახლა სამართალდამცავები იძიებენ. ფაქტზე გამოძიება დაწყებულია. ზურა ჩხაიძეს ხუთშაბათს დაკრძალავენ.

"კვირის პალიტრა" სამძიმარს უცხადებს გარდაცვლილის ოჯახს მომხდარი ტრაგედიის გამო.

წყარო