ჩეჩენი ალია ოზდამიროვა, რომელიც ჩეჩნეთიდან მუქარის გამო გაიქცა, საქართველოდან 9 ნოემბერს მოტყუებით ან ძალით გაიყვანეს, ის ჩეჩნეთში დაბრუნებისთანავე გაურკვეველ ვითარებაში გარდაიცვალა

 "33 წლის ალიამ ჩეჩნეთი 20 ოქტომბერს დატოვა... მან განაცხადა, რომ მისი სექსუალური ორიენტაციის შესახებ ინფორმაცია გარკვეული ადამიანებისთვის, მათ შორის მისი ბიძაშვილებისთვის, გახდა ცნობილი და რომ მუქარა მათგან და მისი ძმისგან მოდიოდა. ალია სტამბოლში გაემგზავრა, საიდანაც საქართველოში გადავიდა" - წერს SK SOS

 ამავე ინფორმაციით, დაკითხვის დროს გაირკვა, რომ ალიას მისი საქმიანობის გამოც ემუქრებოდნენ: "მას ძმებმა სცემეს, რადგან მის ბიზნესპარტნიორებს ინვესტორებისთვის დავალიანება ჰქონდათ და ალიას ქურდობაში ადანაშაულებდნენ". SK SOS -ის ინფორმაციით, ქალი ამ ბრალდებას უარყოფდა და ამბობდა, რომ არავისგან არაფერი მოუპარავს და ამის მოტივი არც ჰქონდა, რადგან მდიდარი ოჯახიდან იყო. ქალი ამბობდა, რომ მის მიერ ნაშოვნი ფული მისმა პარტნიორებმა მოიპარეს.

 "ალია გავლენიანი და მდიდარი ოჯახიდანაა: მისი მამა, უსმან ოზდამიროვი, კადიროვთან დაახლოებული და ჩეჩნეთის ფიზიკური აღზრდისა და სპორტის მინისტრის მოადგილე იყო. ალიას მშობლების მხრიდან ძალადობა ან შეზღუდვები არ განუცდია. 2020 წელს მამამისი გარდაიცვალა და სიტუაცია კიდევ უფრო გართულდა, რადგან მას ვერავინ დაიცავდა ძმებისგან. როგორც მისი ძმა, ასევე ბიძაშვილები კადიროვთან და მის გარემოცვასთან არიან დაკავშირებული. მისი ძმა ადმინისტრაციის უფროსის მოადგილედ მუშაობდა, ბიძაშვილები კი დაცვაში..." - ნათქვამია საგამოძიებო კომიტეტის SK SOS-ის ინფორმაციაში

 ამავე ინფორმაციით, ალიას ნოემბერში აცნობეს, რომ მის წინააღმდეგ, სავარაუდოდ, სისხლის სამართლის საქმე იყო აღძრული „ტერორიზმის დაფინანსებისთვის“ და რომ მას არ შეეძლო საქართველოს დატოვება. თუმცა, მონაცემთა ბაზებში ალიას წინააღმდეგ საქმეები არ აღმოჩნდა და ადამიანის უფლებადამცველებმა გადაწყვიტეს, რომ მისთვის საუკეთესო იქნებოდა საქართველო დაეტოვებინა. 8 ნოემბერს ის თბილისიდან უსაფრთხო ქვეყანაში უნდა გაფრენილიყო. ალია ბაქოში ბიძას დაუკავშირდა, რომელიც საზღვრის გადაკვეთაში დახმარებას დაჰპირდა, თუმცა უთხრა, რომ ეს მხოლოდ 10 ან 11 ნოემბერს იქნებოდა შესაძლებელი, ამიტომ უმჯობესი იქნებოდა გამგზავრება გადაედო. უფლებადამცველებმა კი ქალი გააფრთხილეს, რომ ეს, სავარაუდოდ, ხაფანგი იყო და როგორც დაგეგმილი ჰქონდა, 8 ნოემბერს დაეტოვებინა ქვეყანა.

 "ჩვენი ინფორმაციით, ალიამ საქართველო-რუსეთის საზღვარი 9 ნოემბერს გადაკვეთა. მეორე დღეს გავრცელდა ჭორები, რომ ის გარდაიცვალა. ეს ინფორმაცია 12 ნოემბერს დადასტურდა, როდესაც დაკრძალვა გაიმართა. ოჯახი ამტკიცებს, რომ გარდაცვალების მიზეზი ბუნებრივი იყო. გოგონას მეგობრები და ნაცნობები, ასევე SOS საგამოძიებო კომიტეტის ადამიანის უფლებადამცველები, თვლიან, რომ ალია „ღირსების მკვლელობის“ მსხვერპლი გახდა. გაურკვეველია, დაკავშირებულია თუ არა მისი იძულებითი დაბრუნება და შესაძლო მკვლელობა მის სექსუალურ ორიენტაციასთან თუ ოჯახის უკმაყოფილებასთან მისი ბიზნეს პრობლემებით" | ნათქვამია საგამოძიებო კომიტეტის ინფორმაციაში