“ბენდი უსპონსორობამ გააქცია… სიცარიელეა, ვანოც ამბობს, სტუდიაში თავს კარგად ვერ ვგრძნობო” – თამუნა ლეკვეიშვილი ბენდზე, როლებსა და შვილებზე
ბოლო რამდენიმე გადაცემაა,”ვანოს შოუ“ ეთერში ისე გადის, რომ ბენდი აღარ უკრავს. სტუდიაში ბენდის წევრები არ სხედან. თუ რა ხდება, სად და რატომ გაქრა “ვანოს შოუს” ბენდი, ამის გასარკვევად მის ხელმძღვანელს – თამუნა ლეკვეიშვილს დავუკავშირდით.
თამუნასთან საუბრისას კიდევ არაერთ საკითხს შევეხეთ, რასაც AMBEBI.GE-ს მკითხველი ამ ინტერვიუდან შეიტყობს.
– თამუნა, უჩვეულო სიტუაციაა. “ვანოს შოუ” ბენდის გარეშე იწერება. სად წავიდა ბენდი, რატომ აღარ უკრავს შოუში?
– ბენდი უსპონსორობამ გააქცია. გარდა იმისა, რომ ხელფასები არ აქვთ და ასევე ინსტრუმენტებსაც სჭირდება გახმოვანება, – ეს ცალკე ხარჯებია. ამ ეტაპზე ამ ყველაფერს ვერ გავწვდით, რადგან სპონსორები არ გვყავს. არხიც, ჩვენც, საკუთარი ძალებით, ვცდილობთ, სპონსორები ვიპოვოთ, მაგრამ ჯერჯერობით არ გამოდის. თან წლის ბოლოა და კომპანიებს სარეკლამო ბიუჯეტი გახარჯული აქვთ. ისიც არის, რომ კრიტიკული მედიების შემთხვევაში თავს იკავებენ.
– ფაქტია, რომ ბენდი “ვანოს შოუს” მართლაც აკლია…
– კი, სიცარიელეა, ვანოც ამბობს, რომ სტუდიაში თავს კარგად ვერ ვგრძნობო… იმედი დავიტოვოთ, რომ ახალი წლიდან “ვანოს შოუც” ეთერში იქნება და შოუში ბენდი დაბრუნდება… მისი წევრები კარგი ბიჭები არიან, ზოგი ადრეც იყო ჩვენთან „მთავარ არხზე“ რომ ვიყავით, ზოგი ორკესტრში უკრავს, მაგალითად, “ჩასაბერები,“ დანარჩენები – სხვადასხვა ბენდებში მუშაობენ.
– ბოლო დროს ნინო წილოსანის როლი კარგად მოირგე… როგორია ეს როლი შენთვის?
– ამ როლისთვის სპეციალურად თვალის ლინზები შევიძინე, რადგან ნინო წილოსანს დამახასიათებელი, ძალიან ღია თვალის ფერი აქვს. ჩემთვის საინტერესო იყო ამ პერსონაჟის გაკეთებას როგორ შევძლებდი. საერთოდ, როდესაც ამა თუ იმ ადამიანის პერსონაჟს ქმნი, უტრირებ. ცოტა უფრო მანერულს ხდი, რომ დასამახსოვრებელი იყოს… როდესაც მაგ როლს ვირგებ, ზუსტად ნინო წილოსანის თვალის ფერი მაქვს. უბრალოდ, ჩემს ღია ფერის ლინზებს, კამერა ისევე ვერ აღიქვამს… როლში კი მაშინვე შევდივარ, როგორც კი ლინზებს ჩავისვამ. თმის ვარცხნილობაც ძალიან მეხმარება… ეს პერსონაჟი პირველად შარშან გავაკეთეთ და პირველივე ნომერს კარგი გამოხმაურება ჰქონდა… ამ როლში თავს ძალიან კომფორტულად ვგრძნობ.
– პრეზიდენტ სალომე ზურაბიშვილის როლში?
– პრეზიდენტ სალომე ზურაბიშვილის როლში?
– საერთოდ ყველა როლზე ასე ხდება – კოსტიუმს, პარიკს რომ ვირგებ, მაშინვე რაღაცნაირად ის ვხდები, ვის პაროდიასაც ვქმნი. სალომე ზურაბიშვილზეც ასევე კომფორტულად ვგრძნობ თავს. საერთოდ, რაც გამიკეთებია, ყველა როლს ვირგებ, მათ შორის, ქეთი დოლიძეც არის…
– რატომ არ იფიქრე, თავის დროზე, “თეატრალურში” სამსახიობოზე ჩაგებარებინა?
– ბავშვობიდან ვამბობდი, რომ კონსერვატორიაში უნდა ვისწავლო-მეთქი, რაღაცნაირად ამოჩემებული მქონდა. მერე როცა აბიტურიენტი ვიყავი, ვფიქრობდი, ხომ არ ჩამებარებინა “თეატრალურზე“-თქო?! რაღაც შეხვედრაც მქონდა “თეატრალურში” მუსკომედიის კათედრაზე სპეციალისტთან. მოვეწონე და მირჩია, აუცილებლად ჩააბარე ჩვენთანო, მაგრამ ბოლოს სწავლა მაინც კონსერვატორია გადავწყვიტე.
იმ სფეროში, რა სფეროშიც ვარ, ძალიან საჭიროა მუსიკალური მხარე. ეს მნიშვნელოვანია და სწორედ კონსერვატორია დამეხმარა იმაში, რომ აქ მოვხვედრილიყავი, სადაც ვარ. თავიდანვე მუსიკიდან მოხდა ჩემი ტელევიზიაში ინტერგრაცია. თავის დროზე მუსიკალური ნომერი ჩავწერეთ, რომელიც დათო გოგიჩაიშვილმა ნახა და ამის შემდეგ დამიკავშირდა… საბოლოოდ მაინც მუსიკამ მოახდინა ჩემი ტელევიზიასთან და გადაცემებთან დაახლოება. თან ამ გადაცემებს, იმავე „ვანოს შოუს,“ რა თქმა უნდა, სჭირდება კარგი მუსიკალური ხელმძღვანელი (ცოტა თავის ქება გამოდის). მუსიკალური ნომრები, რაც კეთდება, ვმონაწილეობ თუ არა მათში, ყველაფერს მე ვაკეთებ. მუსიკოსობა იმაში მეხმარება, რომ ნამუშევარი გამოვიდეს კარგი, უფრო გემოვნებიანი და მუსიკალურად სწორად გამართული. თან, ამ კუთხით უკვე ამდენი წლის გამოცდილება დამიგროვდა.
ახლა ბენდი რომ არ გვყავს, ესაა სირთულე, თორემ თვითონ მუშაობის პროცესში არანაირი სირთულე არ არსებობს. მთავარია, იდეა იყოს და მერე ყველაფერი აუცილებლად გაკეთდება. ჩვენ ასე ვუდგებით საკითხებს, რომ აუცილებლად გაკეთდება და არა ისე, ნეტავ, თუ გამოვა?! ვიცით, რომ უნდა გაკეთდეს და კეთდება.
– ბევრი აღნიშნავს, რომ შენს გარეგნობაში ბოლო დროს რაღაცები თითქოს შეცვლილია… ყოველ სატელევიზიო სეზონზე თითქოს სულ უფრო საუკეთესო ფორმაში ხარ…
– სინამდვილეში ისეთს არაფერს ვაკეთებ, რაც სერიოზულ ჩარევას მოითხოვს, რასაც ქალების უმრავლესობა 40 წლის შემდეგ მიმართავს. მე ცოტა ბოტოქს ვიყენებ იმ ადგილებში, სადაც შეიძლება ნაოჭი გაჩნდეს – შუბლის მიდამოში, თვალების კუთხეებში. ტუჩის ფილერი საკმაოდ ხარისხიანი აღმოჩნდა. ვცდილობ, წონაში არ მოვიმატო. ეს კი ყველაზე მნიშვნელოვანი რამაა. წონას სასწორით ვაკონტროლებ. რომ ვთქვა, ყოველდღე ვიწონები-მეთქი, არა, მაგრამ სასწორი სულ მიდევს გამოსაჩენ ადგილას, როცა ავიწონები, გული არ გამოსკდეს. ტანსაცმელს თუ თავისუფლად ვიცვამ, ე.ი. კარგ წონაზე ვარ. თუ ცოტა მიჭერს, ე.ი. მოვიმატე და მერე ვიწონები. მეორე დღეს კი ვიწყებ მოგონილ დიეტას…
ზოგადად ტკბილი არ მიყვარს, მირჩევნია, ხორციანი, მარილიანი, ცხარე, – კაცური საჭმელები. როცა დიეტაზე ვარ და საჭმელს ვკრძალავ და უცნაუ
რია, ტკბილი მაშინ მინდება. მაგ შემთხვევაში შოკოლადს მივირთმევ…
– კარგი გამოხმაურება აქვს სოციალურ ქსელებში შენი და შენი შვილის, ელენეს დუეტს. მართლაც სასიამოვნოდ უკრავთ დედა-შვილი. ამ ვიდეოების ჩაწერის იდეა როგორ გაჩნდა და გაგვაცანი ელენე.
– ეს ვიდეოები ‘ტიკ-ტოკზე“ დავიწყეთ და მერე გადმოვიტანე „ფეისბუკზეც“… ელენე 11 წლისაა, ნიჭიერთა ათწლედში სწავლობს ფორტეპიანოზე და ძალიან კარგი მონაცემები აქვს. მის ასაკში რომ ვიყავი, ასე კარგად ვერ ვუკრავდი – ჩემთან შედარებაც არ შეიძლება, იმდენად კარგად უკრავს. ბევრად უკეთესი ბგერა, ტექნიკა, ხელის დგომა აქვს და ძალიან მიხარია ეს ამბავი.
ამ დუეტის გაკეთება მას მერე მოვიფიქრე, რაც ვუყურებდი, ელენე თანამედროვე მულტფილმებისა და თამაშების საუნდტრეკებს როგორ უკრავდა. ის მუსიკა მხოლოდ ელენესგან გავიგე, არ ვიცოდი და მომეწონა. ვუთხარი – შენ თემები დაუკარი და მე აკომპანიმენტს და რიტმს მოგცემ-მეთქი. პირველი ვიდეო რომ ჩავწერეთ, რომელიც იმ მულტფილმებიდან ერთ-ერთი პოპულარული საუნდტრეკი იყო, „ტიკ-ტოკზე“ დავდე და ძალიან პოპულარული აღმოჩნდა. როცა ხალხს რაღაც მოსწონს და უკურეაქციაც დადებითია, მერე გინდება, რომ კიდევ გააკეთო და უკვე ქართული მუსიკაც ჩავწერეთ. კარგი გამოხმაურება გვაქვს. ბუნებრივია, დადგმული არ არის…
იმ დღეს ელენე სკოლიდან მოვიდა თქვა – ვიღაც ქალმა გამაჩერა და მითხრა, შენ ელენე არ ხარ, თამუნას შვილი? როგორ მიყვარს თქვენი ვიდეოებიო… ყველა ვიდეოზე მწერენ, იქნებ ნოტები ჩაგვიგდოთ. ყველას ვპასუხობ, ნოტები არ არსებობს, თითოეული 15 წუთში გაკეთებულია და იქვე.
– მოკლედ, ელენეს შემთხვევაში გენეტიკა “მუშაობს”…
– ასე გამოვიდა. მე, გიგი – ჩემი ქმარი, გიგის მშობლები, – ყველა პროფესიონალები. ჩემს მხარესაც დიპლომიანი მუსიკოსები არ ყოფილან, მაგრამ აბსოლუტურად ყველა მღეროდა და მღერის, უკრავს. რაც შეეხება ჩემს ნიკოლოზს, რომელიც 13 წლის არის, მუსიკა საერთოდ არ აინტერესებს, თუმცა რომ ვუყურებ, რა მუსიკაც მოსწონს, აჰყვება ხოლმე, კარგი სმენა აქვს, აბსოლუტურად ზუსტად მღერის. უფროსი – ნინი ელენეზე უკეთ მღერის, კარგი ხმა აქვს, აბსოლუტური სმენაც. თუ ელენესთან გამომივიდა, ვიდეო გადავიღოთ და დავუკრათ-თქო, ნინისთან არ გამომდის, ჯიუტია, 15 წლის არის, თინეიჯერობის პიკშია და ჯერ ვერანაირად მივუდექი. ვფიქრობ, ვოკალის პედაგოგთან მივიყვანო. მოკლედ, ვნახოთ. ამ ეტაპზე ჯერ ელენეა ჩვენი მუსიკალური ხაზის გამგრძელებელი.
– ბოლოს რა გვეტყვი?
– მინდა, რომ ბედნიერი ქვეყანა გვქონდეს, რომ ჩემმა შვილებმა ცივილიზებულ, ევროპულ, განვითარებულ და დემოკრატიულ ქვეყანაში იცხოვრონ თავის ქართულ ტრადიციებთან ერთად. ეს ყველაფერი რომ ერთად იყოს შერწყმული – საუკეთესო სურვილი იქნებოდა ჩემთვისაც, ჩემი ოჯახისთვისაც, ჩემი შვილებისთვისაც და ჩემი ქვეყნისთვისაც.
- კომენტარები
