ქართულმა მუსიკალურმა სამყარომ კიდევ ერთი დანაკლისი განიცადა - გარდაიცვალა მომღერალი გოჩა ლორია, ხელოვანი, რომელიც გასული საუკუნის ლეგენდარული ანსამბლებისა და მიუზიკლების განუყოფელი ნაწილი იყო. სამწუხარო ინფორმაციას მისი შვილი, თათა ლორია სოციალურ ქსელში აქვეყნებს.
მისი შემოქმედებითი გზა ისეთ საკულტო ანსამბლებს უკავშირდება, როგორებიცაა „რერო“, „75“ და „ივერია“. ის სცენაზე ისეთი ვარსკვლავების გვერდით იდგა, როგორებიც იყვნენ ბუბა კიკაბიძე და თემურ ცაგურია.
სამი სიმღერა, რომელმაც ის ეპოქის სიმბოლოდ აქცია.
მიუხედავად მრავალფეროვანი რეპერტუარისა, თავად მომღერალი ყოველთვის აღნიშნავდა, რომ ფართო პოპულარობა სამმა მთავარმა ნამუშევარმა მოუტანა:
„დრო სათაყვანო“ - სიმღერა, რომელიც ანსამბლ „75“-ში ყოფნისას მისი სავიზიტო ბარათი გახდა; ყვავის პარტია - მიუზიკლში „ჩხიკვთა ქორწილი“, რომელიც მან 1500-ჯერ შეასრულა ცოცხლად; „ჩურჩულები“ - 1999 წელს დაწერილი ჰიტი, რომლის ტექსტისა და მუსიკის ავტორიც თავად იყო. გოჩა ლორია მხოლოდ შემსრულებელი არ ყოფილა; ის იყო არტისტი, რომელმაც „ჩხიკვთა ქორწილის“ პირველი, დაუვიწყარი ყვავის სახე შექმნა.
ინფორმაცია პანაშვიდებისა და დაკრძალვის შესახებ მომღერლის ქალიშვილი თათა ლორია ავტცელებს:
პანაშვიდი: 11-13 აპრილი, 17:00 საათიდან.
მისამართი: პატარა დიღომი, გრიგოლ ფერაძის ქ. №9 ა.
გამოსვენება: 14 აპრილს (სამშაბათს), 14:00 საათზე, წმინდა ილია მართლის სახელობის ტაძრიდან (აგრარულ უნივერსიტეტთან).
- კომენტარები
