ძალაუფლების და ქონების დაკარგვით დასტრესილი ოლიგარქი მოსკოვის დახმარებით, გადასარჩენად მიადგა ტრამპის საოჯახო კომპანიას და მის მიერ თბილისისთვის წართმეულ იპოდრომზე აშენებს ტრამპ თაუერსს, - ამის შესახებ საგანგებო ბროიფინგზე "ლეიბორისტული პარტიის" ლიდერმა შალვა ნათელაშვილმა ისაუბრა.
ნათელაშვილი აღნიშნავს, რომ საკითხთან დაკავშირებით უკვე მიმართეს ამერიკის შეერთებული შტატების ხელისუფლებას, მათ შორის პრეზიდენტს, სახელმწიფო მდივანსა და კონგრესის წევრებს, მოწოდებით, შეწყდეს აღნიშნული შეთანხმება.
ოპოზიციური პარტიის ლიდერი აცხადებს, რომ მსგავსი პროექტები, მისი შეფასებით, ემსახურება „რეჟიმის შენარჩუნებას“ და არა ქვეყნის განვითარებას, და ხაზგასმით აღნიშნავს, რომ პროცესში აუცილებელია საერთაშორისო პარტნიორების აქტიური ჩართულობა.
ზუსტად 14 წლის წინ კრიმინალური ორგანიზაცია "ქართული ოცნება" დარეგისტრირდა პოლიტიკურ პარტიად. ზუსტად იმ დროიდან "ლეიბორისტულმა პარტიამ" დაიწყო ბრძოლა ივანიშვილის დასანქცირებისთვის და აღნიშნული პროცესი ახლა უკვე ადის პიკზე და კულმინაციაზე. ძალაუფლების და ქონების დაკარგვით დასტრესილი ოლიგარქი მოსკოვის დახმარებით, არც მეტი, არც ნაკლები, გადასარჩენად მიადგა ტრამპის საოჯახო კომპანიას და გაფორმებული კონტრაქტით მის მიერ თბილისისთვის წართმეულ იპოდრომზე აშენებს ტრამპ თაუერსს - ცათამბჯენს.
ჩვენთვის, რა თქმა უნდა, ასევე მნიშვნელოვანია მოკავშირე აშშ-ს პრეზიდენტის და მისი ოჯახის რეპუტაცია. გაგზავნილი იქნა სპეციალური მიმართვა რამდენიმე საათის უკან აშშ-ს პრეზიდენტზე, სახელმწიფო მდივანზე, კონგრესის და სენატის ყველა წევრზე და ამერიკულ მასმედიაში მოთხოვნით და თხოვნით, შეწყდეს აღნიშნული კონტრაქტი და არ იქნას გამოყენებული ეს ავტორიტეტული ხაზი ამერიკის ხელმძღვანელისა ივანიშვილის კრიმინალური, პუტინისტური რეჟიმის გადასარჩენად.
მინდა, ყველამ იცოდეს, რომ ვერცერთი ცათამბჯენი საქართველოზე მაღლა ვერ აიწევა ვერასდროს და ქართველი ხალხი ამერიკელი მეგობრების, ევროპელი ხალხების დახმარებით მიაღწევს იმას, რომ ქვეყანა გათავისუფლდება ამ ტარტაროზებისგან, - განაცხადა ნათელაშვილმა.
- კომენტარები
