ქალი, რომელმაც გარდაცვლილ ქმარს წიგნი მიუძღვნა, მისი მკვლელი აღმოჩნდა - მას 25 წლით თავისუფლების აღკვეთა ემუქრება

35 წლის ამერიკელი ქალი, კორი რიჩინსი, ოთხი წლის წინ დაქვრივდა მას შემდეგ, რაც მისი 39 წლის ქმარი, ერიკ რიჩინსი, 2022 წლის 4 მარტს მოულოდნელად გარდაიცვალა. თავდაპირველად სიკვდილი ბუნებრივ მიზეზებს - გულის შეტევას ან ზედოზირებას - მიაწერეს.

კორის განცხადებით, იმ ღამით ქმარს კოქტეილი გაუკეთა, შემდეგ კი ბავშვის გამო სხვა ოთახში გადავიდა. დილის 3 საათზე დაბრუნებულმა ერიკი უგონოდ იპოვა და 911-ში დარეკა. თუმცა რამდენიმე კვირაში ჩატარებულმა ექსპერტიზამ გარდატეხა შეიტანა საქმეში - ერიკის სისხლში ფენტანილის სასიკვდილოზე ბევრად მაღალი დოზა აღმოჩნდა. გახმაურებული საქმის შესახებ უცხოური მედიაც აქტიურად წერდა. 

გამოძიებამ დაადგინა, რომ ერიკს ადრე უკვე ჰქონდა ეჭვი ცოლის მიმართ - ახლობლების თქმით, ის რამდენჯერმე ცუდად გახდა კორის მიერ მომზადებული საკვების მიღების შემდეგ. გადამწყვეტი აღმოჩნდა ასევე ყოფილი დამლაგებლის ჩვენება, რომელმაც განაცხადა, რომ კორისთვის ფენტანილი მოიპოვა.

საქმეში მნიშვნელოვანი იყო ფინანსური მოტივიც. ოჯახი გარედან წარმატებულად გამოიყურებოდა: ერიკს ჰქონდა მომგებიანი სამშენებლო/უძრავი ქონების ბიზნესი, ხოლო კორი დამოუკიდებლად ცდილობდა უძრავი ქონების პროექტების განვითარებას. თუმცა გამოძიებამ აჩვენა, რომ კორის ბიზნესს სერიოზული პრობლემები ჰქონდა - დაახლოებით 4.5 მილიონი დოლარის ვალი და 20-ზე მეტი კრედიტორი.

დამატებით ფაქტორად იქცა საქორწინო ხელშეკრულება: განქორწინების შემთხვევაში კორი მნიშვნელოვან ქონებას ვერ მიიღებდა. ამასთან, ერიკმა სიკვდილის წინ შეცვალა ანდერძი და დაზღვევა, სადაც ცოლი აღარ ფიგურირებდა. მისი გარდაცვალების შემთხვევაში კი ქონებაზე კონტროლი კორის ხელში გადადიოდა. გამოძიებამ ასევე დაადგინა, რომ მას პარალელურად რომანი ჰქონდა სხვა მამაკაცთან.

საინტერესოა, რომ 2023 წელს კორი რიჩინსმა გამოსცა საბავშვო წიგნი „შენ ჩემთან ხარ?“, რომელიც შვილებისთვის მამის დაკარგვასთან გამკლავებაში დახმარებას ისახავდა მიზნად. წიგნის გამოქვეყნებიდან მალევე ის დააკავეს.

2026 წლის მარტში ნაფიცმა მსაჯულებმა კორი რიჩინსი დამნაშავედ ცნეს მკვლელობასა და თაღლითობაში. სასამართლო პროცესზე მისი ქცევა ბევრისთვის უცნაური იყო - ის მთელი დროის განმავლობაში უკიდურესად მშვიდი ჩანდა და გაუნძრევლად იჯდა, ვერდიქტის გამოცხადების დროსაც კი.

სასჯელი ჯერ არ გამოცხადებულა, თუმცა მას მინიმუმ 25 წლით თავისუფლების აღკვეთა ემუქრება.