მაღალჩინოსნების მოადგილეები ფულად დანამატებსა და პრემიებს მიიღებენ - ინიციატივა პარლამენტში "ქართულმა ოცნებამ" უკვე წარადგინა

მაღალჩინოსნების მოადგილეები ფულად დანამატებსა და პრემიებს მიიღებენ | ინიციატივა პარლამენტში "ქართულმა ოცნებამ" უკვე წარადგინა. აქამდე არსებული კანონმდებლობის მიხედვით, მინისტრებს, მერებს, სახელმწიფო რწმუნებულებსა და მათ მოადგილეებს დანამატისა და ფულადი ჯილდოს მიღება არ შეუძლიათ.

 ახლად ინიცირებული კანონპროექტის განმარტებით ბარათში ვკითხულობთ, რომ დანამატისა და ჯილდოს გაცემა ზემდგომი თანამდებობის პირების გადაწყვეტილებით და არსებული ბიუჯეტის გათვალისწინებით მოხდება. ამავე რეგულაციის მიხედვით, სახელფასო დანამატის ერთდროული მოცულობა არ უნდა აღემატებოდეს თანამდებობრივი სარგოს 1 თვის ოდენობას. ასევე, წლის განმავლობაში მიღებული ჯამური დანამატი ვერ გადააჭარბებს წლიური სარგოს 20%-ს და წლიური ფულადი ჯილდოს მაქსიმალური ზღვარი სარგოს 10%-ით განისაზღვრება.

 კანონპროექტის ავტორები აღნიშნავენ, რომ ხელმძღვანელი პირებისთვის დანამატის აღების შეზღუდვა გამართლებულია, რათა ინტერესთა კონფლიქტი თავიდან იქნას აცილებული, თუმცა იგივე საფრთხე არ დგას მოადგილეების შემთხვევაში.