"ჩემი ირაკლის უკარგესი მეგობარი! სასტიკად გამოასალმეს სიცოცხლეს" - რას წერენ ვერაზე მოკლული ნიკოლოზ ღუნაშვილის შესახებ

"17 წლის ასაკში სიცოცხლე არ უნდა წყდებოდეს…

ერთი ახალგაზრდა, სავსე ოცნებებითა და მომავლის იმედით, სასტიკად გამოასალმეს სიცოცხლეს. ვერანაირი სიტყვა ვერ გაამართლებს ასეთ ტრაგედიას და ვერ შეამსუბუქებს იმ ტკივილს, რომელსაც მისი ოჯახი და ახლობლები განიცდიან.

ღრმა მწუხარებას გამოვთქვამ მომხდარის გამო. ვუსამძიმრებ ოჯახსა და ყველას, ვისაც ეს მძიმე დანაკლისი შეეხო. დაე, სიმართლემ და სამართლიანობამ აუცილებლად იზეიმოს.

ჩემი ირაკლის უკარგესი მეგობარი!" - წერენ სოციალურ ქსელში 17 წლის ნიკოლოზ ღუნაშვილის შესახებ. 

მკვლელობა ვერაზე   

თბილისის ცენტრში, ვერაზე, ხორავას ქუჩაზე გვიან საღამოს შეიარაღებული თავდასხმა მოხდა. სროლის შედეგად 4 ადამიანი დაიჭრა, მათ შორის ორი არასრულწლოვანი. დაშავებულები სასწრაფო-სამედიცინო დახმარების ჯგუფებმა კლინიკებში გადაიყვანეს, თუმცა ერთ-ერთი მოზარდის გადარჩენა ექიმებმა ვერ შეძლეს - მიყენებული ჭრილობებისგან 17 წლის ნიკოლოზ ღუნაშვილი გარდაიცვალა. იგი 2008 წელს იყო დაბადებული და 1 აგვისტოს 18 წელი უსრულდებოდა. ახალგაზრდამ სკოლა წელს დაასრულა და ერთიანი ეროვნული გამოცდები წარმატებით ჩააბარა.

ტრაგიკულად დაღუპულ მოზარდს სოციალურ ქსელში ემშვიდობებიან:

 „ეს შემზარავი ამბავი არ უნდა მომხდარიყო! არ ვიცი, რა დავწერო... უდიდესი ტკივილით და გადაჭარბების გარეშე გეტყვით, რომ თავისი ცხოვრების წესითა და აღზრდით ნიკოლოზი მიწიერი ანგელოზი იყო და ალბათ, ამიტომ პატარა ასაკში გაფრინდა - გადაიქცა ზეციურ არსებად!

სკოლა ამ წელს დაასრულა, ეროვნული გამოცდები წარმატებით ჩააბარა, 1-ელ აგვისტოს 18 წლის გახდებოდა... 22 ივლისის არასრულწლოვანებზე თავდასხმამ ნიკოლოზის სიცოცხლე დაასრულა, ჩააქრო ოჯახის იმედი! დედას რა ვუთხრათ, რა იმედი მივცეთ?! ეს დასასრულია აზროვნებისაც და სიცოცხლისაც! ღმერთმა გააძლიეროს ჩემი უტკბესი, საამაყო ოჯახი! უმცროსი ძმასავით ამშვენებდა დედ-მამას და ყველას აბედნიერებდა ნიკოლოზი“.

შინაგან საქმეთა სამინისტროს მიერ გვიან ღამით გავრცელებული ინფორმაციით, სამართალდამცველებმა ცხელ კვალზე ჩატარებული ოპერატიულ-საგამოძიებო მოქმედებების შედეგად, დანაშაულის ჩამდენი პირი მომხდარიდან მალევე დააკავეს.

მკვლელობის საქმეზე დაკავებულია 1983 წელს დაბადებული ნიკოლოზ კაპანაძე. უწყების ცნობით, მან აყვანისას სამართალდამცავებს წინააღმდეგობა გაუწია, რის შედეგადაც სხეულის დაზიანება მიიღო.