გამოძიება სისხლის სამართლის კოდექსის 109-ე მუხლის "კ" ქვეპუნქტით მიმდინარეობს, რაც ოჯახის წევრის მიმართ დამამძიმებელ გარემოებაში ჩადენილ განზრახ მკვლელობას გულისხმობს. დანაშაული 20 წლამდე ან უვადო თავისუფლების აღკვეთას ითვალისწინებს.
ბრალდებულის ადვოკატმა თავიდანვე ჟურნალისტებთან თქვა, რომ მისი დასაცავი დანაშაულს არ აღიარებს. როგორც აღმოჩნდა, დაკავებულმა თეკლა გერსამიამ დანაშაული თავდაპირველად აღიარა, თუმცა სასამართლო პროცესზე ის ირწმუნებოდა, რომ პოლიციის განყოფილებაში მასზე ფსიქოლოგიურად იძალადეს და აღიარებით ჩვენებასაც ხელი ამიტომ მოაწერა.
სასამართლო სხდომის დახურვა მოითხოვეს ბრალდებულმა და მისმა ადვოკატმა. ამბობდნენ, რომ დარბაზი ჟურნალისტებს დაეტოვებინათ, რადგან არ სურდათ საქმეში არსებული დეტალები მედიაში გავრცელებულიყო, თუმცა მათი მოთხოვნა მოსამართლემ არ დააკმაყოფილა.
ბრალდებულ თეკლა გერსამიას ადვოკატი ნინო გიგაური მისი დასაცავის 30 000-ლარიანი გირაოს სანაცვლოდ გათავისუფლებას ითხოვდა, საქმის პროკურორი გია შაიშმელაშვილი კი - მისთვის პატიმრობის შეფარდებას.
საქმის მასალების მიხედვით, ბრალდებულმა თეკლა გერსამიამ ლუკა დარასელია სადარბაზოში დანის ჩარტყმით მოკლა. ამ ფაქტს, როგორც ჩანს, წინ უძღვოდა მათ შორის კონფლიქტი. თუმცა უცნობია, კონკრეტულად რა იყო კონფლიქტის მიზეზი, ამ დეტალებზე სასამართლო პროცესზე არც ბრალდებულს და არც პროკურორს არ უსაუბრიათ.
ცნობილია ის, რომ ბრალდებული ქალი მცირეწლოვან შვილთან და ლუკა დარასელიასთან ერთად საბურთალოზე, ნაქირავებ ბინაში ცხოვრობდა. ასევე ცნობილია, რომ თეკლა გერსამიას პირველი ქორწინებიდან ჰყავს 4 წლის გოგონა. როგორც ახლობლები ჩვენთან საუბარში ამბობენ, მისი ქმარი დიმა გ., ამჟამად ციხეში იხდის სასჯელს. ერთ-ერთი მისი ნაცნობი იმასაც ამბობს, თეკლა ჩვენთან ერთად იდგა რუსთაველზე, ხელისუფლებას პატიმრებისთვის ამნისტიის გამოცემას რომ ვთხოვდით, რადგან მისი ქმარიც იხდის სასჯელსო. ისიც ვიცი, რომ ქმარს ციხეში აკითხავდაო.
გამოძიების ინფორმაციით, თეკლამ რამდენიმე თვის წინ გაიცნო ლუკა დარასელია და მას შემდეგ ისინი ერთად ცხოვრობდნენ. თეკლა გერსამიას დედა კი ირწმუნებოდა, რომ ისინი ერთად არ ცხოვრობდნენ და რომ ლუკა დარასელიამ თვითმკვლელობის მიზნით მიიყენა თვითდაზიანება, რადგან მისი შვილი უყვარდა.
„ეგენი ერთად არ ცხოვრობდნენ. ამ ბიჭს უყვარდა ძალიან და უნდოდა მასთან ყოფილიყო. თეკლა წინააღმდეგი იყო. ისე მოხდა, რომ ხელი მოაწერეს. ამ ბიჭს სერიოზული პრობლემები, ვალები ჰქონდა. თეკლა საზღვარგარეთ აპირებდა წასვლას, პასპორტიც კი წაართვა, არ გამეპაროსო. თავის ნივთებში იყო ეს პასპორტი, რომ ამოიღეს, სულ ემუქრებოდა, რომ თავს მოვიკლავო... ხან ხელებს ისერავდა, რას აღარ შვებოდა... თვითონ მიიყენა დაზიანებები სადარბაზოში ერთ-ერთი ჩხუბის და მუქარის დროს. სადარბაზოში იყო და თვითონ ჩაირტყა ეს დანა და თეკლამ გამოაძრო ეს დანა. მერე თეკლა გავარდა, მიჰყავდა მხარზე აკიდებული, რომ სასწრაფომდე ჩაეყვანა, მაგრამ ვეღარ ჩაიყვანა კიბეებზე, იმიტომ, რომ გაითიშა. გავარდა გარეთ, სასწრაფო მოიყვანა და კლინიკაშიც კი გაჰყვა. გადარჩენას ცდილობდა", - ამბობს ჟურნალისტებთან დაკავებულის დედა.
ამ ინფორმაციას კატეგორიულად უარყოფს ლუკა დარასელიას ოჯახი. ისინი მომხდარში დაკავებულს ადანაშაულებენ და მის უმკაცრესად დასჯას ითხოვენ.
"კვირის პალიტრა" ესაუბრა მოკლული ბიჭის დეიდას, ირმა ესართიას:
- გაგვამწარა ამ ქალმა და ახლა ცდილობს, ეს დანაშაული აიცილოს. მინდა, მთელმა საზოგადოებამ გაიგოს, ამდენი თვის განმავლობაში ჩვენ რა გამოვიარეთ. ძალიან ძნელია ამ რეალობასთან შეგუება. ლუკა უპატიოსნესი ბიჭი იყო, ქათამსაც რომ არ მოკლავდა, ისეთი. 22 წელი გუშინ შეუსრულდა. თბილისში წავიდა და ეს ქალი რომ გაიცნო, მან პირველივე დღეს წაიყვანა თავის სახლში. უბოროტო, კეთილი ბიჭი იყო ლუკა. არ ვიცით, რა გაუკეთა, სულ სხვანაირი გახდა. არადა სიცოცხლეზე უზომოდ შეყვარებული ბიჭი იყო....
ბოლო დროს ამ ქალის გარდა არავინ უნდოდა. ეს ქალი გათხოვილი იყო, ჰყავდა შვილი, მისი ქმარი ციხეშია და იქიდან ემუქრებოდა ლუკას მოკვლით. ჩემი და ტიროდა, მოთქვამდა, მეკარგება ჩემი შვილიო. ლუკას მამა მოსკოვში მუშაობდა, იქიდან ჩამოვიდა თბილისში, რომ ეშველა შვილისთვის და მოეშორებინა ამ ქალისთვის, მაგრამ ვერაფერი შევძელით.
ჩემი და პოლონეთში მუშაობდა, იქიდან უნდა ჩამოსულიყო, ახლა ხელფასის აღებას ელოდებოდა, რადგან ამ ქალმა ვალები დაადო. ტყუილებს თხზავდა. ლუკას მშობლებს ატყუებდა და ფულს სძალავდა. ეუბნებოდა ლუკა დაიჭირეს და გირაოს თანხა 7000 ლარია გადასახდელიაო. ჩემი და პოლონეთში წვალობდა, იქ ფულს სესხულობდა და ამას უგზავნიდა, ეგონა, მართლა პრობლემები ჰქონდა მის შვილს. პროფესიით იურისტი ვარ და ვუთხარი ჩემს დას, არ გაუგზავნო ფული-მეთქი. მერე დაურეკა ამ ქალმა ჩემს დას - ადვოკატთან მოვილაპარაკე და 4000-მდე ჩამოვიდა გირაოს თანხაო. დაიჯერა და ჩემმა სიძემ გამოუგზავნა ეს ფული.
ძალოვან უწყებებში ნაცნობები მყავს და გავარკვიე, რომ არანაირი საქმე ლუკას წინააღმდეგ არ იყო აღძრული, ეს იყო ტყუილი, არავითარი გირაო მას არ ჰქონდა გადასახდელი. ასე სძალავდა ფულს ჩემს დას და სიძეს. ერთხელ ლუკამ სოფელში, დარჩელში ჩაიყვანა, დედაჩემთან. სახლში მარტო ბებო იყო. ამ სოფელში გაზრდილია ლუკა და ვისაც გინდათ ჰკითხეთ, როგორი იყო. ერთი ღამე დარჩნენ იქ და დედაჩემს რაც კი გაუხსნელი თეთრეული და პირსახოცები ჰქონდა, ყველაფერი მოჰპარა. ყველაფერი დაუკითხავად წაიღო სახლიდან. მათი წასვლიდან მეოთხე დღეს რომ ავიდა დედაჩემი მეორე სართულზე, მაშინ ნახა, რომ კარადებში ნივთები არ იყო. შვილებს გეფიცებით, ეს სიმართლეა...
მისი ქმარი ციხეში ზის და რადგან ის იმუქრებოდა, გვეშინოდა რაიმე არ დაეშავებინა ლუკასთვის. იქიდან ემუქრებოდა მოკვლით. თვეები ვცდილობდით, რომ დაგვეშორებინა, ვერ დავაშორეთ. როგორც ვიცი, ქმარმა, თურმე, ვიღაცები გამოაგზავნა ლუკასთან და გავიგეთ, რომ ეძებდნენ მას. ამის გამოც ვნერვიულობდით. თვითონ ის ქალი ამბობდა, სულ ერთად ვართ და ვერავინ ვერ შეეხება ლუკასო. ერთი წუთით გარეთაც არ გავუშვებო...
თუ მოკლავდა, ამას ვინ წარმოიდგენდა, როგორ ვიწვი საცოდაობით. ისეთი ბიჭი მოგვიკლა, კეთილი და უბოროტო ჩემი ნება რომ იყოს, ლინჩის წესით უნდა გაასამართლო, რომ სხვამ არ გაბედოს ასეთი სისასტიკე. უმკაცრესად დაისაჯოს, სამუდამო პატიმრობა უნდა მიესაჯოს. ის შეჭამს, იცოცხლებს და ჩემი ლუკა აღარ არის. ისე გაგვამწარა, რომ სული მეწვის. არ ვიცი, რა გაუკეთა ლუკას, ბოლოს არავინ უნდოდა. ერთი და ჰყავს და იმასთან რომ დაერეკა, ამის უფლებასაც არ აძლევდა. ლუკას ყველგან დაჰყვებოდა. დაახლოებით, 6 თვეს იყვნენ ერთად. ადვოკატისთვის მინდა ფულიო, დაურეკა ჩემს დას რამდენჯერმე და სასწრაფოდ გამოაგზავნინა 500 ლარი, მერე გავიგეთ, რომ, თურმე, თავისი შვილის ბაღის ზეიმისთვის უნდოდა ეს თანხა და იმაში დახარჯა. ძალიან მოწესრიგებული ბიჭი იყო ლუკა, სულ წვერგაპარსული, გაპრანჭული დადიოდა, რაც ეს ქალი გაიცნო, მას მერე წვერს არ იპარსავდა, თმებს არ იჭრიდა, არ აძლევდა ნებას რომ ადამიანურად ყოფილიყო. რამდენიმე თვეა, ეს ამბები ტრიალებს ჩვენს თავს. ვერ დავიხსენით მისგან ლუკა.
ლუკა როგორ გადავიდა მის გვარზე, ესეც არ ვიცით. ეს მკვლელობის შემდეგ გავიგეთ. ვფიქრობ, იმიტომ გამოუცვალა გვარი, რომ უნდოდა ლუკა საზღვარგარეთ წაეყვანა. სულ იქებდა თავს, ლუკას ჩემი სურათი დააქვსო. ჩემმა დამ გააფრთხილა - ჩემს შვილს ერთი თმის ღერი არ ჩამოუვარდესო. ჩვენ გვეშინოდა, თეკლას ქმარს რაიმე არ დაეშავებინა ლუკასთვის ან ვინმე არ გამოეგზავნა. ამას ვინ წარმოიდგენდა, რომ ეს ქალი მოკლავდა?!
რაც მკვლელის დედამ ილაპარაკა, სულ ტყუილია. გამორიცხულია, თვითდაზიანება ყოფილიყო, ეს აბსურდია. თავისი დის სახლში არ უშვებდა, მამიდა ახლოს ცხოვრობს და იქ არ უშვებდა ლუკას მარტო. ბოლო პერიოდში ტელეფონი არ ჰქონდა. "ფეისბუქის" გვერდიც თეკლას ჰქონდა. ბოლო დროს ფეისბუქის პროფილი გაუუქმა, არადა ჩემს ლუკას ურთიერთობა უყვარდა, მეგობრები უყვარდა. ამის მერე დაივიწყა ყველა და ყველაფერი. თვითმკვლელობას კატეგორიულად გამოვრიცხავ და ამას დაამტკიცებს ექსპერტიზა.
არ ვიცით მიზეზი, რატომ მოგვიკლა. მიყვარსო, ამბობდა და რატომ მოკლა? შეიძლება მიხვდა რომ თანხის გამოძალვა აღარ გამოსდიოდა უკვე. ჩვენ ყველა მივხვდით, რომ ფულს სძალავდა ოჯახს. ახლა ველოდებით გამოძიებას. მიზეზი უნდა გაირკვეს, რატომ მოგვიკლა ჩვენი ლუკა და უმკაცრესად უნდა დაისაჯოს. დიდი იმედი მაქვს რომ გამოძიება სრულყოფილი იქნება. ერთი ღრმა ჭრილობა აქვს მიყენებული ჩემს ლუკას გულმკერდის არეში, მან გამიზნულად მიაყენა ეს ჭრილობა", - ამბობს მოკლული ბიჭის დეიდა.
როგორც ზემოთ აღვნიშნეთ, ბრალდებული ქალი ბრალს არ აღიარებს. თეკლა გერსამიას თქმით, ვაკე-საბურთალოს მეორე სამმართველოში, სადაც ის 4 წლის შვილთან ერთად იმყოფებოდა, რამდენიმე საათის განმავლობაში, ჩვენება ზეწოლის შედეგად მისცა.
"მე მარტო ის შემიძლია ვთქვა, რომ ფსიქოლოგიურად იძალადეს ჩემზე. ძალიან ემოციური ადამიანი ვარ. ჩემს გარშემო იყო ათი ადამიანი, მათ შორის - ეს ადამიანი, პროკურორი, მიმეორებდა, შენ ჩაიდინე, შენ დაჭერი, მოაწერე ოქმს ხელი და წახვალ შენს შვილთან. მე მყავს 4 წლის გოგო და იმ წუთას, რასაც მეუბნებოდნენ, იმას ვაკეთებდი. ბოლოშიც ვიმეორებ, ხომ გამიშვებთ სახლში, იმის გამო ვთქვი, რაც ვთქვი, რომ დავბრუნებულიყავი ჩემს შვილთან. ნახევარი არ მახსოვს, რაც მოვყევი. თუ მე ადამიანი განზრახ მოვკალი და ამაში მედება ბრალი, მაშინ ეს ადამიანი ჩემივე ხელით რატომ ვატარე მთელი სადარბაზო, რატომ მივიყვანე სასწრაფოში ჩემი ხელით? ვითხოვდი ადვოკატს, ფსიქოლოგიურად ვერ ვიყავი კარგად და დახმარება მჭირდებოდა. მიმალვაზე გეტყვით, რომ მყავს 4 წლის შვილი. ლუკა რომ მივიყვანე კლინიკაში და თქვეს კარგადაა, ერთადერთი განზრახვა მქონდა, ბავშვი წამეყვანა დედაჩემთან. არ მივმალულვარ. დარეკა პოლიციამ და დედამ უთხრა, ახლავე მოვიყვანო, მალევე მივედი პოლიციაში. საჭმელს ვაკეთებდი, წყალი მოშვებული იყო, დანა ჩაგდებული, გარეცხილი არაა. რომ შედიხარ სახლში, ეგრევე „კუხნაა“ და ჩავაგდე, არც დამიმალავს ეს დანა. ამოვიტანე და ონკანში ჩავაგდე“, - აცხადებს თავად ბრალდებული თეკლა გერსამია.
პროკურორი გია შაიშმელაშვილი კი ამბობს, რომ ბრალდებულმა მტკიცებულების განადგურება, კერძოდ კი - დანაშაულის იარაღიდან კვალის წაშლა სცადა:
„ბრალდებული არ უარყოფს, ვერც უარყოფს, რომ როდესაც სასწრაფო მიიყვანა შემთხვევის ადგილზე, დანა, რომლითაც მოხდა ახალგაზრდა კაცის დაზიანება, აიტანა საცხოვრებელ სახლში, ჩააგდო სამზარეულოს ნიჟარაში და გარეცხა. შეეცადა და განახორციელა მამხილებელი ინფორმაციის განადგურება“, - თქვა საქმის პროკურორმა. თეკლა გერსამია კი მას ასე პასუხობს: „ეს ფაქტი რომ მოხდა, მე ვაკეთებდი საჭმელს, წყალი მოშვებული იყო. დანა არ არის გარეცხილი, უბრალოდ ჩაგდებულია, ონკანი იყო მოშვებული. როდესაც ლუკა ჩაიყვანეს და მე უკან ამოვბრუნდი, რომ ბავშვი ჩამეყვანა, დანა, რომელიც ისევ იქ ეგდო, ავიღე, პირდაპირ ონკანში ჩავაგდე, ავიყვანე ბავშვი და გავყევი ლუკას სასწრაფოსთან ერთად. მას შემდეგ, რაც კლინიკაში მივიყვანე, მერე შვილთან ერთად ტაქსით, დედასთან, თავისუფლების მოედანზე წავედი, რადგან მისთვის ბავშვი დამეტოვებინა და კვლავ კლინიკაში დავბრუნებულიყავი". მისი თქმით, დედასთან იყო, როდესაც გამომძიებლებმა დარეკეს და ის პოლიციის განყოფილებაში დაიბარეს. თავად მივიდა პოლიციაში და იქვე დააკავეს.
საქმის გამოძიება აქტიურად მიმდინარეობს, ცხედარს ექსპერტიზა ჩაუტარდა, ექსპერტიზის პასუხზე ბევრი რამ არის დამოკიდებული. თეკლა გერსამია ახლა სასჯელაღსრულების დაწესებულებაში იმყოფება და იქ დაელოდება სასამართლო პროცესების დაწყებას. ვნახოთ, რა გაირკვევა და რა ვერდიქტს გამოუტანს მას სასამართლო.
