"დილა ონკოლოგიურით იწყებოდა...გავთხოვდი ადამიანზე, რომელსაც, რეალურად, არც ვიცნობდი...” - ლალიტა ლომთაძე

მომღერალ ლალიტა ლომთაძის “საქართველოს ხმაში” გამოჩენას მაყურებლის დიდი სიმპატია მოჰყვა, თუმცა მან ათეულის შესარჩევ ტურში ვერ მიიღო მონაწილეობა, რაც დიდი მითქმა-მოთქმის საგანი გახდა. ლალიტა ბავშვობიდან მღერის, ის “საქართველოს ხმის” ფინალისტის გიორგი ჭიალაშვილის მეუღლეა. რატომ გამოეთიშა პროექტს და რა სირთულეების გადალახვა უწევს წყვილს ამის შესახებ “პრაიმ ტაიმს” ესაუბრა.

- იმას რომ ათეულში ვერ გადავედი დიდი აჟიოტაჟი მოჰყვა, მაგრამ რეალობა სულ სხვაა. ძალიან რთული დღეები გამოვიარე, პირველი კასტინგის შემდეგ, ყელის პრობლემები შემექმნა, ხმა არ მქონდა. ორი კვირა რომ ვერ დავიბრუნე ხმა, წავედი მომღერლების ექიმთან ირინა ქაცარავასთან. მან გამსინჯა და აღმოაჩინა, რომ იოგზე მაქვს კისტა. მითხრა სიმღერას მაქსიმალურად უნდა მოერიდოო და მეც გავდივარ მკურნალობის პროცესს. უარი ვთქვი ათეულის გადასარჩევ ტურში მოსვლაზე, ამ ხმით ვერ ვივლიდი რეპეტიციებზე. სულ სხვა გეგმები და იმედები მქონდა, რომელიც სამწუხაროდ ისე არ განვითარდა.

- როგორც ვიცი კონკურსებთან დაკავშირებით მძიმე გამოცდილება გაქვს, ვრცლად მოგვიყევით ამის შესახებ...

- ადრე მივიღე კონკურსში მონაწილეობა, სადაც ჟიურის ერთ-ერთმა წევრმა ძალიან დამაბულინგა. იმ პერიოდში კარაოკეში ვმუშაობდი სტუდენტი გოგონა, რომელსაც რთული ოჯახური პრობლემები ჰქონდა. იმ ქალბატონმა მითხრა, მე შენ როგორ უნდა გცე პატივი, როცა სცენაზე მღერი და ქვემოთ ვიღაც ბარკალს ივლებს პირშიო. მას შემდეგ როცა წარმოვიდგენდი სადმე ჟიურის წინაშე სიმღერას გული მეკუმშებოდა.

- რა პრობლემები შეექმნა თქვენს ოჯახს, რის გამოც იძულებული გახდით რესტორანში დაგეწყოთ მუშაობა?

- ბებიაჩემს სიმსივნე დაემართა, ლამის ხელებში ჩამაკვდა. ბაბუა მასზე დარდს გადაჰყვა და უცებ ძლიერი ოჯახის შვილი დავრჩი ჰაერში. ჩემი ყოველი დილა ონკოლოგიურით იწყებოდა და მთავრდებოდა. ფუფუნებაში გაზრდილი ვიყავი, მანამდე ჭურჭელიც კი არ გამირეცხავს და ყველაფერი ბებოს მკურნალობაში და სხვადასხვა პრობლემების მოგვარებაში ჩავდეთ, შემდეგ კი დავკარგეთ. ოქროებით დაწყებული რაც გვქონდა ყველაფერი გავყიდეთ. დავიწყე კარაოკეში მუშაობდა, უამრავ მთვრალ ადამიანთან კონტაქტი მიწევდა, მყავდა კარგი სამეგობრო, რომელიც გვერდზე მედგა და წაქცევის უფლება არ მომცა. პურის ფული რომ არ მქონდა, დილით თავთან მიტოვებდა ჩემი დაქალი 5 და 10 ლარს. მაგ პერიოდში სწორედ რესტორანმა გადამარჩინა. რესტორანში კარაოკეზე უფრო მეტი ჰონორარი რომ გადამიხადეს, ვიფიქრე ეს ფული ვინმემ არ წამართვას-მეთქი. ხალხის სიყვარული სწორედ რესტორანში დავიმსახურე და თითო-თითო კაცობით შევაგროვე ათასობით მსმენელი. ახლა ვდგავარ მე ფეხზე, რადგან აქამდე არავინ მყავდა გვერდში. ბევრ ადამიანს შეეძლო ჩემი უზრუნველყოფა, არ მყოლია ბობოლა საყვარლები, რომელიც რაღაცას გამიკეთებდა, ყველაფერს ჩემი შრომით და სიკეთით მივაღწიე. ჩემს მეუღლეს გიორგი ჭიალაშვილსაც იმიტომ შევხვდი. არასდროს არავისი არაფერი მინდოდა, უსიყვარულოდ ურთიერთობები რად მინდოდა?

მადლიერი ვარ “საქართველოს ხმით”, რადგან გადამალახინეს ყველაზე დიდი წინაღობა რაც მქონდა. როცა წარმოვიდგენდი ჟიურის წინ გასვლას, სული მეხუთებოდა.

ჩემი მეუღლისგან გიორგისგან გამომდინარე ყველას შინაურულად ვიცნობ რუსთავი 2-ში, შესაბამისად როცა სცენაზე გავედი უბედნიერესი ვიყავი.

- ახლა მკურნალობის რა ეტაპზე ხართ?

- ახლა ელექტროთერაპიას გავდივარ, კისერსა და ყელს შუა გადის დენი, რომელიც აცხრობს კისტას. დეკემბრიდან ნელ-ნელა შემიძლია ძველ ფორმას დავუბრუნდე. მაქვს წინასწარ აღებული შეკვეთები და ვმღერი, მაგრამ ყოველდღიურ რეპეტიციებს ვერ შევძლებდი. სიმღერა არის თან ჩვენი ოჯახის შემოსავალი. სექტემბრიდან სრულად აღდგება ჩემი ხმა.

- თქვენი სიყვარულის ისტორია როგორ დაიწყო?

- მე და გიორგი სკოლის გუნდში ვმღეროდით ერთად, მაგრამ ერთმანეთი წლების შემდეგ ვიპოვეთ და სიმღერამ დაგვაახლოვა. ზუსტად ორ თვეში გავყევი ცოლად. ფაქტობრივად, კოვიდის დროს გავთხოვდი ადამიანზე, რომელსაც რეალურად არც ვიცნობდი. გიორგის დიდი სტრესი აქვს გამოვლილი, დანგრეული აქვს პირველი ოჯახი, უნდოდა გვერდით ჰყოლოდა ადამიანი, რომელიც გაუგებდა სცენაზე დგომის დროს. ორივე ძალიან დიდ პატივს ვცემთ ერთმანეთს. გიორგი მაგარი ადამიანი რომ არ აღმოჩენილიყო, ჩვენი ოჯახი აუცილებლად დაინგრეოდა, რადგან რთული ხასიათი მაქვს. გვქონია რთული პერიოდები, მაგრამ ერთმანეთზე დაყრდნობით გადაგვაქვს პრობლემები. ჩვენ ყველაფერს ვეუბნებით ერთმანეთს და შესაბამისად ყველაფერი გამოსწორებადია.